ਸਾਂਭਣਾ ਜੇ ਹੈ ਘਰਾਂ ਨੂੰ।
ਸਾਂਭਣਾ ਪੈਣਾਂ ਗਰਾਂ ਨੂੰ।
----
ਘਰ ਸਲਾਮਤ ਅਗਰ ਰੱਖਣੇ,
ਪਾਸ ਰੱਖ਼ੀਓ ਖ਼ੰਜਰਾਂ ਨੂੰ।
-----
ਸ਼ੀਸ਼ਿਆਂ ਦੇ ਘਰ ਅਗਰ ਹਨ,
ਦੂਰ ਰੱਖੀਓ ਪੱਥਰਾਂ ਨੂੰ।
----
ਜੇ ਤਲਬ ਤਾਜ਼ਾ ਹਵਾ ਦੀ,
ਖੋਲ੍ਹਣਾ ਪੈਣੈ ਦਰਾਂ ਨੂੰ।
-----
ਘਰ ‘ਚ ਇਕ ਦੀਪਕ ਜਗਾਓ,
ਫਿਰ ਹੀ ਜਾਇਓ ਮੰਦਰਾਂ ਨੂੰ।
-----
ਹਰ ਨਦੀ ਦਾ ਲਕਸ਼ ਇੱਕੋ,
ਜਾ ਮਿਲ਼ੇ ਉਹ ਸਾਗਰਾਂ ਨੂੰ।
-----
ਸਾਫ਼ ਧਰਤੀ ਨੂੰ ਵੀ ਰੱਖੋ,
ਸਾਫ਼ ਰੱਖਿਓ ਅੰਬਰਾਂ ਨੂੰ।
-----
ਪੰਛੀਓ ਅੰਬਰ ਜੇ ਗਾਹੁਣੇ,
ਖੋਲਣਾ ਪੈਣਾ ਪਰਾਂ ਨੂੰ।
-----
ਸੋਚੀਏ ਪਰਦੇਸ ਆ ਕੇ,
ਪਰਤਣਾ ਹੈ ਕਦ ਘਰਾਂ ਨੂੰ।
-----
ਸਾਂਭ ਕੇ ਬੈਠਾ ਹੈ “ਸਾਥੀ”,
ਚਾਨਣ ਦੀਆਂ ਕੁਝ ਕਾਤਰਾਂ ਨੂੰ।
1 comment:
Ludhianwi Sahib tushan chhoti behr change nibe ho-Rup Daburji
Post a Comment