ਧਾਰਮਿਕ ਗੀਤ
ਮੈਂ ਤੇਗ ਦੀ ਧਾਰ ਦੇਖਣੀ ਹੁੰਦੀ ਗਲ਼ ਤੋਂ ਪਾਰ ਦੇਖਣੀ।
ਦਗਦਾ ਚਿਹਰਾ ਹੱਥ ਭਗੌਤੀ ਬੋਲੇ ਗੋਬਿੰਦ ਰਾਏ
ਕੋਈ ਹੈ ਸੂਰਮਾ, ਉਠ ਕੇ ਮੰਚ ‘ਤੇ ਆਏ।
ਕੋਈ ਹੈ ਸੂਰਮਾ...
-----
ਕਾਰੀਗਰ ਨੇ ਪਾਨ ਚਾੜ੍ਹ ਕੇ ਤੇਗ ਸਾਣ੍ਹ ਤੇ ਲਾਈ।
ਇਸਦੇ ਮੂੰਹ ਨੂੰ ਖ਼ੂਨ ਨਾ ਲੱਗਾ ਡਾਢੀ ਇਹ ਤ੍ਰਿਹਾਈ।
ਆਪਣੀ ਰੱਤ ਪਿਲ਼ਾ ਕੇ ਇਸਨੂੰ, ਇਸਦੀ ਪਿਆਸ ਬੁਝਾਏ...
ਕੋਈ ਹੈ ਸੂਰਮਾ...
-----
ਕਲਮ ਕਟਾਰੀ, ਰੱਤ ਸਿਆਹੀ, ਨਵਾਂ ਇਤਿਹਾਸ ਬਣਾਉਣਾ।
ਲਾਲ ਅੱਖਰਾਂ ਦੇ ਵਿਚ ਜਿਸਨੇ, ਆਪਣਾ ਨਾਮ ਲਿਖਾਉਣਾ।
ਜੋ ਪਿਆਰਾ ਅੱਜ ਗੁਰੂ ਦਾ, ਆਪਣਾ ਨਾਮ ਲਿਖਾਏ...
ਕੋਈ ਹੈ ਸੂਰਮਾ...
-----
ਚੌਂਕ ਚਾਂਦਨੀ ਸੀਸ ਪਿਤਾ ਦਾ ਜਦ ਜ਼ਾਲਮ ਨੇ ਲਾਹਿਆ।
ਕਹਿੰਦੇ ਸਿੱਖ ਬੜੇ ਸੀ ਉਥੇ ਕੋਈ ਕੋਲ਼ ਨਾ ਆਇਆ।
ਭੈ ਮੌਤ ਦਾ ਐਸਾ ਹੋਇਆ, ਸਭ ਨੇ ਮੁੱਖ ਲੁਕਾਏ...
ਕੋਈ ਹੈ ਸੂਰਮਾ...
-----
ਤੇਗ ਦੀ ਤਿੱਖੀ ਧਾਰ ਦੇ ਵਿੱਚੋਂ ਐਸਾ ਪੰਥ ਸਜਾਉਣਾ।
ਜ਼ਾਲਮ, ਜ਼ੁਲਮ, ਮੜੀ, ਮੌਤ ਤੋਂ ਜਿਸਨੂੰ ਭੈ ਨਹੀਂ ਆਉਣਾ।
‘ਚੰਦ ਫਰਵਾਹੀ’ ਹੱਕ਼ ਸਭ ਲਈ, ਜਿਹੜਾ ਸਭ ਕੁਝ ਲਾਏ....
ਕੋਈ ਹੈ ਸੂਰਮਾ...
-----
ਕੌਮ ਦਾ ਸੂਰਜ ਬਣ ਕੇ ਜਿਸਨੇ, ਹੈ ਹਨੇਰ ਮਿਟਾਉਣਾ।
ਜਿਸ ਦੀ ਕਦੇ ਜੋਤ ਬੁਝੇ ਨਾ ਐਸਾ ਦੀਪ ਜਗਾਉਣਾ।
ਜੁਗਾਂ ਜੁਗਾਂ ਤੱਕ ਪੰਥ ਮੇਰੇ ਦੇ ਜਿਹੜਾ ਰਾਹ ਰੁਸ਼ਨਾਏ....
ਕੋਈ ਹੈ ਸੂਰਮਾ...
No comments:
Post a Comment