ਨਜ਼ਮ
ਅੱਖਰ ਲਿਖ ਲਿਖ ਸ਼ਬਦ ਬਣਾਏ,
ਲੀਕਾਂ ਪਾ ਪਾ ਅਰਥ ਮਿਟਾਏ!
ਸ਼ੀਸ਼ੇ ਵਿਚ ਜੋ ਵੀ ਬਿੰਬ ਉੱਭਰੇ,
ਉਹੀਓ ਮੇਰਾ ਮੁੱਖ ਝੁਠਲਾਏ!
-----
ਜ਼ਿੰਦਗੀ ਧਰਤ ਦਰਾੜਾਂ ਪਾਟੀ,
ਵਿੱਚ ਦਰਾੜਾਂ, ਅਗਨੀ, ਥਲ;
ਮੈਂ ਡਿੱਗਾਂ, ਤਾਂ ਭਾਫ਼ ਬਣਾਂ,
ਬੀ ਡਿੱਗੇ, ਤਾਂ ਸੁਆਹ ਹੋ ਜਾਏ!
-----
ਕੋਰਾ ਕਾਗ਼ਜ਼, ਤੇਜ਼ ਉਸਤਰਾ,
ਵਾਲ਼, ਵਾਲ਼ ਦੀ ਵਿੱਥ ‘ਤੇ ਲੀਕਾਂ;
ਦੇਹ ‘ਚੋਂ ਛਣਕੇ ਅਲਫ਼ ਚਾਨਣੀ,
ਹਉਂ ਦਾ ਆਰ ਪਾਰ ਦਿਖਲਾਏ!
-----
ਲਹੂ ਮਾਸ ਵਿਚ ਪਿੰਜਰ ਝੂਲੇ,
ਅੱਖਵਾਨੇ ਵਿਚ1. ਅੰਨ੍ਹਾ ਯੁੱਗ –
ਜ਼ਿਹਨੋਂ ਸੱਖਣੀ ਖੋਪਰੀ ਹੇਠਾਂ,
ਕਿੰਜ ਅਹੋਂਦਾ2. ਮੌਸਮ ਆਏ!
-----
ਭੁਰਦੇ ਪੱਤਰ, ਟੁੱਟਣ ਟਾਹਣਾਂ,
ਚੁਭਣ ਸੂਈਆਂ, ਖਿੰਡਣ ਸੋਚਾਂ –
ਆਪੇ ਵਿਚ ਇਕੱਲੀ ਜਿੰਦ ਨੇ,
ਦਿਲ ਨੂੰ ਪਿਆਸੇ ਹੋਠ ਛੁਆਏ!
-----
ਸੱਭੋ ਰੰਗ ਅਜਨਬੀ ਜਾਪਣ,
ਗਣਿਤ, ਸਾਇੰਸ, ਦਰਸ਼ਨ3. ਦੇ ਸੂਤਰ4. -
ਲੱਕੜ ਜਦੋਂ ਸੁਆਹ ਹੁੰਦੀ ਹੈ,
ਭਾਂਬੜ ਦੀ ਛਾਂ ਹੱਥ ਨਾ ਆਏ!
-----
ਆਪਣੇ ਆਪ ਤੋਂ ਖਿਝ ਮੈਂ ਆਪਣੇ,
ਅੰਦਰ ਵਲ ਜਾਂ ਹੱਥ ਵਧਾਏ;
ਮਹਾਂ-‘ਨ੍ਹੇਰ ਵਿਚ ਗੁੰਮ ਚੁੱਕੇ ਸਨ,
ਰੌਸ਼ਨੀਆਂ ਤੇ ਕਾਲ਼ੇ ਸਾਏ!
-----
ਅੱਖਰ ਲਿਖ ਲਿਖ ਸ਼ਬਦ ਬਣਾਏ,
ਲੀਕਾਂ ਪਾ ਪਾ ਅਰਥ ਮਿਟਾਏ!
ਸ਼ੀਸ਼ੇ ਵਿਚ ਜੋ ਵੀ ਬਿੰਬ ਉੱਭਰੇ,
ਉਹੀਓ ਮੇਰਾ ਮੁੱਖ ਝੁਠਲਾਏ!
******
ਔਖੇ ਸ਼ਬਦਾਂ ਦੇ ਅਰਥ: ਅੱਖਵਾਨੇ ਵਿਚ – In the Eye-Socket, 2. ਅਹੋਂਦਾ – ਬਿਨਾਂ ਹੋਂਦ ਤੋਂ 3. ਦਰਸ਼ਨ – ਫ਼ਲਸਫਾ, 4. ਸੂਤਰ - ਫਾਰਮੂਲਾ
1 comment:
ਮਹਾਂ-ਨ੍ਹੇਰ ਵਿਚ ਗੁੰਮ ਚੁੱਕੇ ਸਨ
ਰੌਸ਼ਨੀਆਂ ਦੇ ਕਾਲੇ ਸਾਏ
ਲਾ-ਜਵਾਬ..ਖੂਬਸੂਰਤ ਨਜ਼ਮ
Post a Comment