ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Wednesday, June 23, 2010

ਉਸਤਾਦ ਦੀਪਕ ਜੈਤੋਈ ਸਾਹਿਬ - ਗ਼ਜ਼ਲ

ਗ਼ਜ਼ਲ

ਮਹਿਫ਼ਲਾਂ ਫਿਰ ਸਜਣੀਆਂ ਤੂੰ ਝਾਂਜਰਾਂ ਨੂੰ ਸਾਂਭ ਲੈ।

ਵਾਦਕਾਂ ਨੇ ਪਰਤ ਆਉਣਾ, ਸਰਗਮਾਂ ਨੂੰ ਸਾਂਭ ਲੈ।

-----

ਸਾੜ ਦਿੱਤੇ ਮੌਸਮਾਂ ਨੇ ਵੇਲ-ਬੂਟੇ ਜੇ ਕਿਤੇ,

ਬੀਜ ਲਾਂਗੇ ਵਿਹੜਿਆਂ ਵਿਚ, ਗਮਲਿਆਂ ਨੂੰ ਸਾਂਭ ਲੈ।

-----

ਜਦ ਖਿੜੂ ਗੁਲਜ਼ਾਰ ਆਪਾਂ ਫਿਰ ਉੜਾਵਾਂਗੇ ਕਦੀ,

ਪੋਟਿਆਂ ਤੇ ਉਸ ਸਮੇਂ ਤੱਕ ਤਿਤਲੀਆਂ ਨੂੰ ਸਾਂਭ ਲੈ।

-----

ਹੈ ਨਜ਼ਰ ਜੇ ਅਰਸ਼ ਵੱਲ, ਉੜ ਜਾ ਪਰਿੰਦੇ ਵਾਂਗਰਾਂ,

ਛੱਡ ਖਹਿੜਾ ਧਰਤ ਦਾ, ਜਾ ਕਹਿਕਸ਼ਾਂ ਨੂੰ ਸਾਂਭ ਲੈ।

-----

ਸੁਪਨਿਆਂ ਦੇ ਅੰਬਰੀਂ ਦਿਨ ਚੜ੍ਹਨ ਤੋਂ ਜੇ ਮੁੱਕਰਿਆ,

ਰਾਤ ਦੇ ਵਿਚ ਜੜਨ ਲਈ ਕੁੱਝ ਤਾਰਿਆਂ ਨੂੰ ਸਾਂਭ ਲੈ।

No comments: