ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Monday, August 2, 2010

ਦਾਦਰ ਪੰਡੋਰਵੀ - ਗ਼ਜ਼ਲ

ਗ਼ਜ਼ਲ

ਹੈ ਤਾਂ ਰੱਸੀ, ਪਰ ਰੱਸੀ ਦਾ ਸੱਪ ਬਣਾਈ ਜਾਂਦੇ ਨੇ

ਚਾਰ ਕੁ ਬੰਦੇ ਚਾਰੇ ਪਾਸੇ ਖ਼ੌਫ਼ ਫੈਲਾਈ ਜਾਂਦੇ ਨੇ।

-----

ਉਹ ਪੱਥਰ ਦੀ ਹਉਮੈ ਦਾ ਹੁਣ,ਏਦਾਂ ਭਾਰ ਉਠਾਉਂਦੇ ਹਨ,

ਸ਼ੀਸ਼ੇ ਨੂੰ ਤਿੜਕਣ ਦੇ ਹੀ ਡਰ ਨਾਲ ਡਰਾਈ ਜਾਂਦੇ ਨੇ।

-----

ਰੁੱਖ,ਆਲ੍ਹਣੇ ਅਤੇ ਪਰਿੰਦੇ, ਸੜਕੇ ਹੋ ਗਏ ਰਾਖ਼ ਮਗਰ,

ਵੇਖੋ ਬਾਗ਼ ਦੇ ਮਾਲੀ ਫਿਰ ਵੀ, ਜਸ਼ਨ ਮਨਾਈ ਜਾਂਦੇ ਨੇ।

-----

ਕੁਝ ਲੋਕਾਂ ਨੂੰ ਸੂਰਜ ਦਾ ਹੋਣਾ ਵੀ ਲਗਦੈ ਨਾ-ਮਾਤਰ,

ਪਰ ਕੁਝ, ਜੁਗਨੂੰ ਦੀ ਲੋਅ ਤੋਂ ਵੀ ਰਾਹ ਰੁਸ਼ਨਾਈ ਜਾਂਦੇ ਨੇ।

-----

ਇਕ-ਇਕ ਫੁੱਲ, ਕਲੀ, ਪੱਤੀ ਨੂੰ, ਨਹੀਂ ਮਨਾਹੀ ਤੋੜਨ ਦੀ,

ਬਾਗ਼ ਬਚਾਉਣ ਦਾ ਮਾਲੀ ਫਿਰ ਵੀ, ਢੌਂਗ ਰਚਾਈ ਜਾਂਦੇ ਨੇ।

-----

ਬੰਸਰੀਆਂ ਦੇ ਨਾਂ ਤੇ ਨਿਤ ਭਰਮਾ ਕੇ ਬਾਂਸ ਦੇ ਰੁੱਖਾਂ ਨੂੰ,

ਸ਼ਾਤਰ ਲੋਕੀ ਦਸਤੇ, ਤੀਰ-ਕਮਾਨ ਬਣਾਈ ਜਾਂਦੇ ਨੇ।

-----

ਉਡ ਕੇ ਆਲ੍ਹਣਿਆਂ ਚੋਂ ਪੰਛੀ, ਕਿੱਧਰ ਜਾਣ ਹਨੇਰੇ ਵਿਚ,

ਰੁੱਖਾਂ ਕੋਲ ਖੇਡਦੇ ਬੱਚੇ, ਅੱਗ ਮਚਾਈ ਜਾਂਦੇ ਨੇ।

-----

ਕਿੰਨੀ ਆਜ਼ਾਦੀ ਹਾਸਿਲ ਹੈ, ਪਿੰਜਰੇ ਵਿਚ ਪਰਿੰਦੇ ਨੂੰ,

ਜਾਨ ਗਵਾਉਣ ਤੋਂ ਪਹਿਲਾਂ ਰੱਜਵਾਂ ਚੋਗਾ ਖਾਈ ਜਾਂਦੇ ਨੇ।

-----

ਅਜਕਲ੍ਹ ਕਿੰਨੀ ਆਲ੍ਹਣਿਆਂ ਦੀ ਚਿੰਤਾ ਕਰਦੇ ਨੇ ਮਾਲੀ,

ਟਾਹਣੀ-ਟਾਹਣੀ ਉੱਤੇ ਸ਼ਿਕਰੇ, ਬਾਜ਼ ਬਿਠਾਈ ਜਾਂਦੇ ਨੇ।


1 comment:

Jagjit said...

ਬਹੁਤ ਕਮਾਲ ਦੀ ਗ਼ਜ਼ਲ ਹੈ ਦਾਦਰ ਸਾਹਿਬ। ਬਹੁਤ ਹੀ ਵਧੀਆ।
ਤਨਦੀਪ, ਆਰਸੀ ਦਾ ਵੀ ਧੰਨਵਾਦ।