ਜਿਊਣ ਦਾ ਚਾਅ ਮਘ ਰਿਹੈ, ਠਰਿਆ ਨਹੀਂ।
ਇੱਕ ਵੀ ਸੁਪਨਾ ਮਿਰਾ ਮਰਿਆ ਨਹੀਂ।
-----
ਹਾਰ ਮੈਨੂੰ ਕੀ ਹਰਾਏਗੀ ਭਲਾ,
ਹਾਰਿਆ ਜਿਸਨੇ ਨ ਦਿਲ, ਹਰਿਆ ਨਹੀਂ।
-----
ਉਹ ਕਰੂ ਮਹਿਸੂਸ ਇਸਦਾ ਬੋਝ ਕੀ,
ਕਾਲਜੇ ਪੱਥਰ, ਜਿਨ੍ਹੇ ਧਰਿਆ ਨਹੀਂ।
-----
ਸੱਪ ਜਿਹੜਾ ਕੱਢਣੈਂ ਤੂੰ ਕੱਢ ਲੈ,
ਦੁੱਖ ਕਿਹੜਾ ਜੋ ਅਸੀਂ ਜਰਿਆ ਨਹੀਂ।
-----
ਸਾਰਨਾ ਪੈਂਦਾ ਹੀ ਹੈ, ਪਰਵਾਸ ਵਿਚ,
ਜਿਸ ਬਿਨਾਂ ਪਲ ਵੀ ਕਦੇ ਸਰਿਆ ਨਹੀਂ।
-----
ਰੋਕ ਅਪਣੇ ਅੱਥਰੂ, ਦਿਲ ਡੁੱਬਦੈ,
ਕੌਣ ਕਹਿੰਦੈ ਅੱਥਰੂ ਦਰਿਆ ਨਹੀਂ?
-----
ਰਹਿ ਗਈ ਕਿੰਨੀ, ਗਈ ਕਿੰਨੀ ਵਿਹਾ,
ਦਿਲ ‘ਚ ਸੰਸਾ ਏਸਦਾ ਕਰਿਆ ਨਹੀਂ।
-----
ਵਿਛੜਨਾ ਪੈਣਾ ਹੈ, ਜਾਣੈਂ ਜੌਬ ‘ਤੇ,
ਦਿਲ ਤਾਂ ਮਰ ਜਾਣਾ ਕਦੇ ਭਰਿਆ ਨਹੀਂ।
-----
ਦੁੱਖ ਦੇ ਕੱਟੇ ਨੇ ਤੂੰ ਕਿੰਨੇ ਪਹਾੜ,
‘ਕਿਸ਼ਨ’ ਤੇਰਾ ਹੌਸਲਾ ਹਰਿਆ ਨਹੀਂ।
No comments:
Post a Comment