ਗੁਰਦਰਸ਼ਨ 'ਬਾਦਲ' - ਗ਼ਜ਼ਲ

ਗ਼ਜ਼ਲ

ਚਾਨਣੇ ਮਨਜ਼ੂਰ ਕੇ ਸੌਗ਼ਾਤ ਨੇਰ੍ਹੇ ਦੀ।
ਤਰਜ਼ਮਾਨੀ ਕਰ ਗਏ ਜਜ਼ਬਾਤ ਨੇਰ੍ਹੇ ਦੀ।
ਰਾਤ ਭਰ ਹੀ ਅਕੜਿਆ ਤੇ ਤੀਂਘਿਆ ਹੈ ਜੋ,
ਛਿੱਲ ਲਾਹ ਕੇ ਲੈ ਗਈ ਪਰਭਾਤ ਨੇਰ੍ਹੇ ਦੀ।
ਫੈਸਲਾ ਸੀ ਨੂਰ ਵੱਲੀਂ ਸੋਚ ਦਾ ਪਹਿਲਾਂ,
ਫਿਰ ਸਹੇਲੀ ਬਣ ਗਈ ਕਮਜ਼ਾਤ, ਨੇਰ੍ਹੇ ਦੀ।
ਠੰਢ ਕਰਕੇ ਅਜ ਫੇਰ ਨਾ ਬਾਰੀ ਖੁੱਲ੍ਹੀ ਹੈ,
ਪਰ ਬੁਰਾਈ ਕਰ ਗਈ ਪਰਭਾਤ, ਨੇਰ੍ਹੇ ਦੀ।
ਹੌਸਲੇ ਦੇ ਹੋਰ ਵੀ ਨੇੜੇ ਰਹੀ ਕਰਦੀ,
ਜ਼ਿੰਦਗੀ ਵਿਚ ਹਰ ਦਫ਼ਾ ਬਰਸਾਤ ਨੇਰ੍ਹੇ ਦੀ।
ਨੂਰ ਵੱਲੀਂ ਪਿੱਠ ਜਿੰਨ੍ਹਾਂ ਨੇ ਸਦਾ ਰੱਖੀ,
ਪਰਖਦੇ ਨੇ ਅੰਤ ਵੇਲ਼ੇ ਜ਼ਾਤ ਨੇਰ੍ਹੇ ਦੀ।
ਜਦ ਨਿਸ਼ਾਨੇ ਤੋਂ ਨਜ਼ਰ ਹਟਦੀ ਨਹੀਂ ਮਨ ਦੀ,
ਸਾਮ੍ਹਣੇ ਮੰਜ਼ਿਲ ਦੇ ਕੀ ਔਕਾਤ ਨੇਰ੍ਹੇ ਦੀ?
ਹੋਰ ਭਾਵੇਂ ਜ਼ਿੰਦਗੀ ਵਿਚ ਕੁਝ ਨਹੀਂ ਮਿਲ਼ਿਆ,
ਪਰ ਮਿਲ਼ੀ 'ਬਾਦਲ' ਨੂੰ ਖੁੱਲ੍ਹੀ ਦਾਤ ਨੇਰ੍ਹੇ ਦੀ।