ਗੁਰਦਰਸ਼ਨ 'ਬਾਦਲ' - ਗ਼ਜ਼ਲ

ਗ਼ਜ਼ਲ

ਹੌਸਲੇ, ਹਿੰਮਤ ਅਤੇ ਸਧਰਾਂ ਦੀ ਚਰਚਾ।
ਕੀ ਦਊ ਹੁਣ ਗੁੰਮੀਆਂ ਚੀਜ਼ਾਂ ਦੀ ਚਰਚਾ?
ਪੱਤਝੜ ਆਈ ਤੇ ਫੇਰ ਚਲਦੀ ਬਣੀ ਹੈ,
ਨਾਲ਼ ਮੁੱਕੀ ਕਿਰ ਗਏ ਪੱਤਰਾਂ ਦੀ ਚਰਚਾ।
ਪੱਥਰਾਂ ਤੇ ਸ਼ੀਸ਼ਿਆਂ ਦਾ ਮੇਲ਼ ਦਸਦੈ,
ਫੁੱਲ ਕਰਿਆ ਕਰਨਗੇ ਖ਼ਾਰਾਂ ਦੀ ਚਰਚਾ।
ਅਰਥ ਲੱਭਣ ਵਿੱਚ ਫਿਰ ਆਉਂਦੀ ਹੈ ਮੁਸ਼ਕਿਲ,
ਵਾਕ ਜੇ ਨਾ ਕਰ ਸਕੇ ਸ਼ਬਦਾਂ ਦੀ ਚਰਚਾ।
ਇੱਕ ਚਿਹਰਾ, ਪਾ ਰਿਹਾ ਹੈ ਬਾਤ ਸੌ-ਸੌ,
ਹੈ ਕਿਤੇ ਅੱਖਾਂ, ਕਿਤੇ ਨਜ਼ਰਾਂ ਦੀ ਚਰਚਾ।
ਦਿਨ ਚੜ੍ਹੇ ਬੋਲਾਂ ‘ਚ ਮਿਸ਼ਰੀ ਆ ਗਈ ਹੈ,
ਰਾਤ ਭਰ ਹੁੰਦੀ ਰਹੀ ਮਿਰਚਾਂ ਦੀ ਚਰਚਾ।
ਦੇਸ ਛਡ, ਪਰਦੇਸ ਵਿਚ ਰਹਿੰਦਾ ਹੈ “ਬਾਦਲ”!
ਹੁਣ ਨਹੀਂ ਹੁੰਦੀ ਉਨ੍ਹਾਂ ਖ਼ਬਰਾਂ ਦੀ ਚਰਚਾ।