ਨਿਰਮਲ ਸਿੰਘ ਕੰਧਾਲਵੀ - ਨਜ਼ਮ

ਦੋਸਤੋ! ਮੈਨੂੰ ਇਹ ਗੱਲ ਅੱਜ ਸਭ ਨਾਲ਼ ਸਾਂਝੀ ਕਰਦਿਆਂ ਅਤਿਅੰਤ ਖ਼ੁਸ਼ੀ ਹੋ ਰਹੀ ਹੈ ਕਿ ਯੂ.ਕੇ. ਨਿਵਾਸੀ ਲੇਖਕ ਸਤਿਕਾਰਤ ਨਿਰਮਲ ਸਿੰਘ ਕੰਧਾਲਵੀ ਜੀ ਦੀਆਂ ਬਹੁਤ ਹੀ ਖ਼ੂਬਸੂਰਤ ਜਿਹੀਆਂ ਨਜ਼ਮਾਂ ਸਤਿਕਾਰਤ ਮੋਤਾ ਸਿੰਘ ਸਰਾਏ ਜੀ ਨੇ 'ਆਰਸੀ' ਲਈ ਭੇਜੀਆਂ ਹਨ। ਮੈਂ ਤਹਿ-ਦਿਲੋਂ ਸਰਾਏ ਸਾਹਿਬ ਦੀ ਸ਼ੁਕਰਗੁਜ਼ਾਰ ਹਾਂ। ਕੰਧਾਲਵੀ ਸਾਹਿਬ ਨੂੰ ਆਰਸੀ ਦੇ ਸਮੂਹ ਪਾਠਕ / ਲੇਖਕਾਂ ਵੱਲੋੰ ਆਰਸੀ ਤੇ ਜੀਅ ਆਇਆਂ ਤੇ ਰਚਨਾਵਾਂ ਭੇਜਣ ਲਈ ਧੰਨਵਾਦ ਆਖਦੀ ਹਾਂ। ਅੱਜ ਕੰਧਾਲਵੀ ਸਾਹਿਬ ਦੀਆਂ ਦੋ ਖ਼ੂਬਸੂਰਤ ਨਜ਼ਮਾਂ ਆਰਸੀ ਤੇ ਪੋਸਟ ਕਰਨ ਦਾ ਮਾਣ ਹਾਸਿਲ ਕਰ ਰਹੀ ਹਾਂ। ਬਹੁਤ-ਬਹੁਤ ਸ਼ੁਕਰੀਆ!

ਵਰਤਮਾਨ

ਨਜ਼ਮ

ਤੁਸੀਂ ਜੋ,

ਕੱਲ੍ਹ ਦੀ ਤਲਾਸ਼ ‘ਚ ਨਿਕਲੇ ਹੋ

ਵਰਤਮਾਨ ਨੂੰ ਛੱਡ ਚਲੇ ਹੋ

ਕਿਸ ਦੇ ਹਵਾਲੇ?

ਵਰਤਮਾਨ

ਜੋ ਤੁਹਾਡਾ ਸੰਗੀ ਸਾਥੀ

ਲੰਗੋਟੀਆ ਯਾਰ ਹੈ

ਵਰਤਮਾਨ

ਜੋ ਸੱਚ,

ਸਜੀਵ ਸਦਾ ਬਹਾਰ ਹੈ

ਫਸੀਆਂ ਨੂੰ ਛੱਡ

ਉਡਦੀਆਂ ਮਗਰ ਭੱਜਣ

ਕਿਧਰੋਂ ਦੀ ਸਿਆਣਪ ਹੈ ਭਲਾ?

ਸੋ ਆਉ ਦੋਸਤੋ !

ਵਰਤਮਾਨ ਦਾ ਜਸ਼ਨ ਮਨਾਈਏ

ਤੇ ਕੱਲ੍ਹ ਨੂੰ ਰਹਿਣ ਦੇਈਏ

ਉਹਦੇ ਆਪਣੇ ਹਾਲ ‘ਤੇ!

================

ਬਾਲ ਨਾਥ

ਨਜ਼ਮ

ਬਾਲ ਨਾਥ

ਹੁਣ ਟਿੱਲੇ ‘ਤੇ ਨਹੀਂ

ਏਅਰ ਕੰਡੀਸ਼ੰਡ

ਬੰਗਲੇ ‘ਚ ਰਹਿੰਦਾ ਹੈ

ਹੁਣ ਉਹ ਰਾਂਝੇ ਦੇ ਕੰਨ ਪਾੜ ਕੇ

ਮੁੰਦਰਾਂ ਨਹੀਂ ਪਾਉਂਦਾ

ਸਗੋਂ ਉਹਦੇ ਪਾਸਪੋਰਟ ਦੀ

ਚੀਰ-ਫਾੜ ਕਰਕੇ

ਫੋਟੋ ਬਦਲਦਾ ਹੈ

ਤੇ ਜਾਅਲੀ ਵੀਜ਼ੇ ਦਾ

ਇੰਤਜ਼ਾਮ ਕਰਕੇ

ਉਹਨੂੰ ਤੋਰ ਦਿੰਦਾ ਹੈ

ਕਿਸੇ ਅਣਦੇਖੀ ਮੰਜ਼ਿਲ ਵਲ!