ਗ਼ਜ਼ਲ
ਜਗ ਕਿਉਂ ਕੋਲੋਂ ਪਾਸੇ ਰਹੀਏ,
ਅੰਦਰੋ ਅੰਦਰ ਲਾਸੇ ਰਹੀਏ।
----
ਅਪਣੇ ਹੱਥੋਂ ਮਰ ਜਾਈਏ, ਜੇ,
ਦੁਨੀਆ ਦੇ ਭਰਵਾਸੇ ਰਹੀਏ।
----
ਸੰਗੀ *ਮਾਂਘ੍ਹੇ ਮਾਰਣਗੇ, ਜੇ,
ਓਹਨਾਂ ਕੋਲ ਨਿਰਾਸੇ ਰਹੀਏ।
----
ਜੀਵਨ ਪੀਹਵਣ ਮੁਕਦਾ ਨਾਹੀਂ,
** ਜੁੱਪੇ ਨਿਤ ਖਰਾਸੇ ਰਹੀਏ।
----
ਹੋਰਾਂ ਆਜ਼ਾਦੀ ਸਮਝਾਈਏ,
ਆਪੀ ਭਾਵੇਂ ਫਾਸੇ ਰਹੀਏ।
----
ਦੁੱਖਾਂ ਸਾਨੂੰ ਲਭ ਹੀ ਲੈਣੈਂ,
ਭਾਵੇਂ ਕਿੰਨੇ ਪਾਸੇ ਰਹੀਏ।
----
ਖ਼ੁਸ਼ ਰਖ ਸਕਨੇ ਹਾਂ ਜੀਵਨ, ਜੇ,
ਗ਼ਮ ਨੂੰ ਪਾਂਦੇ ਹਾਸੇ ਰਹੀਏ।
----
ਨੇਕੀ ਕਰਕੇ ਵਾਪਸ ਮੰਗੀਏ,
ਗਿਣਦੇ ਤੋਲੇ ਮਾਸੇ ਰਹੀਏ।
----
ਲੋੜਾਂ ਜੇਕਰ ਮੁਹਲਤ ਦੇਵਣ,
ਪੀਂਦੇ ਘੋਲ਼ ਪਤਾਸੇ ਰਹੀਏ।
----
ਖ਼ੌਰੇ ਕਦ ਮਰ ਜਾਣੈਂ, ਫ਼ਿਰ ਕਿਉਂ,
ਭੁਖਾਂ ਜਰੀਏ, ਪਿਆਸੇ ਰਹੀਏ।
----
‘ਅਸ਼ਰਫ਼’ ਸਭ ਨੂੰ ਮਹਿਕਾਂ ਵੰਡੀਏ,
ਕਿਉਂ ਜਗ ਵਿਚ *** ਬਿਣ-ਬਾਸੇ ਰਹੀਏ।
* ਮਾਂਘ੍ਹੇ ਮਾਰਨਾ: ਠੱਠਾ-ਮਜ਼ਾਕ ਕਰਦਿਆਂ ਤਾੜੀਆਂ ਮਾਰਨੀਆਂ), ** ਜੁਪਣਾ: ਜੋਨਾ ਢੱਗੇ ਨੂੰ ਪੰਜਾਲ਼ੀ ਵਿਚ, *** ਬਿਣ-ਬਾਸੇ ਰਹਿਣਾ: ਬਗੈਰ ਖ਼ੁਸ਼ਬੋ.
1 comment:
ਸਤਿਕਾਰਤ ਅਸ਼ਰਫ਼ ਸਾਹਿਬ! ਗ਼ਜ਼ਲ ਬਹੁਤ ਹੀ ਵਧੀਆ ਹੈ। ਗ਼ਜ਼ਲ 'ਚ ਵਰਤੀ ਭਾਸ਼ਾ...ਲਹਿੰਦੇ ਪੰਜਾਬ ਨਾਲ਼ ਜੋੜਦੀ ਹੈ..ਤੇ ਜਾਣਕਾਰੀ 'ਚ ਇਜ਼ਾਫ਼ਾ ਹੁੰਦਾ ਹੈ।
ਜੀਵਨ ਪੀਹਵਣ ਮੁਕਦਾ ਨਾਹੀਂ,
** ਜੁੱਪੇ ਨਿਤ ਖਰਾਸੇ ਰਹੀਏ।
----
ਹੋਰਾਂ ਆਜ਼ਾਦੀ ਸਮਝਾਈਏ,
ਆਪੀ ਭਾਵੇਂ ਫਾਸੇ ਰਹੀਏ।
----
ਦੁੱਖਾਂ ਸਾਨੂੰ ਲਭ ਹੀ ਲੈਣੈਂ,
ਭਾਵੇਂ ਕਿੰਨੇ ਪਾਸੇ ਰਹੀਏ।
----
ਨੇਕੀ ਕਰਕੇ ਵਾਪਸ ਮੰਗੀਏ,
ਗਿਣਦੇ ਤੋਲੇ ਮਾਸੇ ਰਹੀਏ।
ਬਹੁਤ ਖ਼ੂਬ! ਕਮਾਲ ਦਾ ਸ਼ਿਅਰ ਹੈ ਗਿੱਲ ਸਾਹਿਬ!ਮੁਬਾਰਕਾਂ!
ਤਮੰਨਾ
Post a Comment