ਡਾ: ਦੇਵਿੰਦਰ ਕੌਰ - ਨਜ਼ਮ

ਤਲਾਸ਼
ਨਜ਼ਮ

ਉਹ ਲੱਭਣ ਤੁਰੀ
ਉਹਦੇ ਨਜ਼ਮ ਵਰਗੇ ਸਾਹਾਂ ਨੂੰ
ਰਸਤਿਆਂ ਦੇ ਪਹਾੜ ਟੱਪ
ਧੜਕਦੇ ਸਾਹਾਂ ਦੀ ਝੋਲ ਭਰ
ਵਕਤ ਦੀ ਕਾਲੀ ਸਾਜ਼ਿਸ਼ 'ਚੋਂ…
---
ਉਹ ਨਿਕਲ ਤੁਰੀ
ਆਸਾਂ ਦੇ ਟਟਹਿਣਿਆਂ ਸੰਗ
ਜੁਗਨੂੰਆਂ ਦੀ ਮੁੱਠ ਭਰ…
ਪਹੁੰਚੀ ਉਸ ਦੇ ਦੁਆਰ
ਚੁੱਪ ਉਸਨੂੰ ਜੀ ਆਇਆਂ ਆਖਿਆ
ਖੁੱਲੀਆਂ ਖ਼ਾਮੋਸ਼ ਅੱਖਾਂ
ਆਪਣਾ ਰਾਗ ਸੁਣਾਇਆ...
ਚਿਹਰੇ ਦੀ ਲਾਲੀ
ਬਦਨ ਦੀ ਖ਼ੁਸ਼ਬੂ
ਪਹੁੰਚ ਚੁੱਕੀ ਸੀ ਦਸਵੇਂ ਦੁਆਰ
----
ਰਸਤਿਆਂ ਦੀਆਂ ਬੇਵਫ਼ਾਈਆਂ
ਸਰ ਕਰਦਿਆਂ ਕਰਦਿਆਂ...
ਉਹਦੇ ਸਾਹਾਂ ਦੀ ਧੜਕਣ
ਤੇਜ਼ ਹੋਈ
ਉਹਦੇ ਹੱਥਾਂ 'ਚ ਫੜੇ
ਜੁਗਨੂੰਆਂ ਦੀ ਮੁੱਠ
ਹੋਰ ਪੀਢੀ ਹੋਈ...
---
ਮਰ ਗਏ ਜੁਗਨੂੰ
ਮੁੱਠ ਪੀਚਦਿਆਂ
ਉਹਦੀ ਨਜ਼ਮ ਦੀ ਹਰ ਸਤਰ
ਸਾਹ ਘੁੱਟ ਮੋਈ
ਜਦ ਨੇਰ੍ਹਿਆਂ ਸੰਗ ਬਹਿ
ਉਹ ਖ਼ੂਬ ਰੋਈ!