ਸੁਰਜੀਤ - ਨਜ਼ਮ

ਦਹਿਲੀਜ਼

ਨਜ਼ਮ

ਪਹਿਲੀ ਉਮਰ ਦੇ

ਉਹ ਅਹਿਸਾਸ

ਉਹ ਵਿਸ਼ਵਾਸ

ਉਹ ਚਿਹਰੇ

ਉਹ ਰਿਸ਼ਤੇ

ਅਜੇ ਵੀ ਤੁਰ ਰਹੇ ਨੇ

ਮੇਰੇ ਨਾਲ ਨਾਲ !

.........

ਯਾਦਾਂ ਦੇ ਕੁਛ ਕੰਵਲ

ਅਜੇ ਵੀ ਮਨ ਦੀ ਝੀਲ ‘ਚ

ਤੈਰ ਰਹੇ ਨੇ ਓਵੇਂ ਦੇ ਓਵੇਂ !

ਸੁਹਲ-ਸਲੋਨੇ ਸੁਪਨੇ

ਅਜੇ ਵੀ ਪਲਕਾਂ ਹੇਠਾਂ

ਪਲਮ ਰਹੇ ਨੇ

ਓਸੇ ਤਰ੍ਹਾਂ !

........

ਤਿਤਲੀਆਂ ਫੜਨ ਦੀ

ਉਮਰ ਦੇ ਚਾਅ

ਅਜੇ ਵੀ ਮੇਰੀਆਂ ਤਲੀਆਂ ‘ਤੇ

ਟਪੂਸੀਆਂ ਮਾਰ ਕੇ ਨੱਚ ਰਹੇ ਨੇ !

ਇੰਦਰ-ਧਨੁਸ਼ ਦੇ ਸੱਤੇ ਰੰਗ

ਅਜੇ ਮੇਰੀਆਂ ਅੱਖਾਂ ‘ਚ

ਖਿੜ ਖਿੜ ਹੱਸ ਰਹੇ ਨੇ !

...............

ਮੇਰੇ ਅੰਦਰ ਦੀ ਸੁਹਲ ਜਿਹੀ ਕੁੜੀ

ਅਜੇ ਤੱਕ ਦੋ ਗੁੱਤਾਂ ਕਰੀ

ਹੱਥ ਵਿਚ ਕਿਤਾਬਾਂ ਫ਼ੜੀ

ਕਾਲਜ ਵਿਚ ਸਖੀਆਂ ਸੰਗ

ਜ਼ਿੰਦਗੀ ਦੀ ਸਟੇਜ ‘ਤੇ

ਗਿੱਧਾ ਪਾਉਂਦੀ ਹੈ !

............

ਹੈਰਾਨ ਹਾਂ ਕਿ

ਮਨ ਦੇ ਧਰਾਤਲ ‘ਤੇ

ਕੁਛ ਵੀ

ਨਹੀਂ ਬਦਲਦਾ !

ਪਰ ਹੌਲੀ ਹੌਲੀ

ਸ਼ੀਸ਼ੇ ਵਿਚਲਾ ਆਪਣਾ ਅਕਸ

ਬੇਪਛਾਣ ਹੋਈ ਜਾਂਦੈ !!