ਅਜੋਕਾ ਗਲ਼ੀ-ਗੁਆਂਢਨਜ਼ਮ
ਸੰਪਰਕ ਕਾਪੀ ਦੇ ਪੰਨੇ ਪਲਟਦਿਆਂ
ਬਦਲੇ ਪਤੇ ਤੇ ਫ਼ੋਨ ਨੰਬਰ ਵਿੰਹਦਿਆਂ
ਕਿੰਨੇ ਸਵਾਲ ਜ਼ਿਹਨ ਵਿਚ
ਉੱਠ ਉੱਠ ਖਲੋਣ
..........
ਕਿੱਥੇ ਗਿਆ ਪੁਰਖਿਆਂ ਦਾ ਘਰ
ਕਿਹੋ-ਜਿਹੇ ਬਣਨਗੇ ਹੁਣ ਰਿਸ਼ਤੇ
ਕਿਹੋ ਜਿਹਾ ਹੋਊ ਗਲ਼ੀ-ਗੁਆਂਢ
ਵੀਹੀ ਵਿਹੜਿਆਂ ਨਾਲ਼
ਕਿੰਝ ਦਾ ਹੋਊ ਮੋਹ...?
..........
ਕੀ ਹੁਣ ਹਵਾ ‘ਚ ਰਲ਼ੀ ਮੁਸ਼ਕ ਤੋਂ
ਮਿਲ਼ਿਆ ਕਰੂ
ਗੁਆਂਢੀ ਦੇ ਮਰ ਜਾਣ ਦੀ ਕਨਸੋਅ...??
=====
ਟੱਬਰ
ਨਜ਼ਮ
ਟੱਬਰ
ਆਦਮੀ ਦੇ ਪੈਰਾਂ ‘ਚ ਪਾਏ ਬੇੜੀ
ਹੱਥਾਂ ‘ਚ ਹੱਥਕੜੀ
ਤੇ ਮੂੰਹ ਨੂੰ ਲਗਾਮ ਦੇਵੇ ਟੱਬਰ
............
ਮੋਹ ਦੀ ਵਲਗਣ ‘ਚ ਵਲ਼ ਕੇ
ਬੰਦੇ ਨੂੰ ਬਿਸਕੁਟ ਵਾਂਗ ਤੋੜੇ
ਛੱਲੀ ਵਾਂਗ ਭੋਰੇ
ਤੇ ਹੌਲ਼ੀ-ਹੌਲ਼ੀ ਭਸਮ ਕਰੇ
ਮਨੁੱਖ ਦੀ ਸੱਤਿਆ
...........
ਟੱਬਰ
ਨੂੜ ਕੇ ਹੱਥ ਪੈਰ
ਯੁੱਧ ‘ਚ ਘੱਲੇ ਆਦਮੀ ਨੂੰ
ਜਿੱਥੇ ਹਰ ਪਲ ਬੰਦਾ
ਤਿਲ਼ ਤਿਲ਼ ਮਰਦਾ, ਜਿਉਂਦਾ
ਮੁੜ ਮਿਲ਼ਣ ਲਈ
ਟੱਬਰ ਆਪਣੇ ਨੂੰ।
No comments:
Post a Comment