ਗ਼ਜ਼ਲਯਾਰ ਦਾ ਸੱਥਰ ਚੰਗਾ ਸਮਝਣ ਵਾਲ਼ੇ ਕਿੱਥੇ।
ਪੱਟ ਨੂੰ ਚੀਰਨ ਵਾਲ਼ੇ ਉਹ ਮਤਵਾਲੇ ਕਿੱਥੇ।
-----
ਕਦੇ ਪਰੇਮੀ ਸਹਿਰਾਵਾਂ ਵਿਚ ਰੁਲ਼ ਜਾਂਦੇ ਸਨ,
ਅੱਜ ਕੱਲ੍ਹ ਅੱਖੀਂ ਹੰਝੂ, ਪੈਰੀਂ ਛਾਲੇ ਕਿੱਥੇ।
-----
ਕੰਮ ਕਾਰ ਵਿਚ ਦਿਨ ਨੂੰ ਲਾਂਭੇ ਹੋ ਜਾਂਦੀ ਹੈ,
ਐਪਰ ਜਾਵੇ ਯਾਦ ਤੇਰੀ ਤ੍ਰਿਕਾਲ਼ੇ ਕਿੱਥੇ।
-----
ਮਸਜਦ ਕਿਓਂ ਹੈ ਇੱਥੇ, ਕਿਓਂ ਹੈ ਮੰਦਰ ਇਥੇ,
ਝਗੜੇ ਬਾਝੋਂ ਮਸਜਦ, ਸ਼ਿਵ ਦੁਆਲੇ ਕਿੱਥੇ।
-----
ਆਦਮ ਦਾ ਆਦਮ ਦੋਸਤ ਹੈ, ਇਕ ਮਹਿਰਮ ਹੈ,
ਇੰਝ ਦੀਆਂ ਸੋਚਾਂ ਆਦਮ ਦੇ ਵਿਚ ਹਾਲੇ ਕਿੱਥੇ।
-----
ਅਜੇ ਤਾਂ ਮਾਨਵ ਰੰਗ ਭੇਦ ਤੋਂ ਮੁਕਤ ਨਹੀਂ ਹੈ,
ਅਜੇ ਤਾਂ ਮਾਨਵ ਆਖੇ ਗੋਰੇ, ਕਾਲ਼ੇ ਕਿੱਥੇ।
-----
ਕੁੱਲ ਦੁਨੀਆਂ ਨਾ ਉੱਕਾ ਅਜੇ ਸੁਤੰਤਰ ਹੋਈ,
ਟੁੱਟੀਆਂ ਨਾ ਜ਼ੰਜੀਰਾਂ, ਟੁੱਟੇ ਤਾਲੇ ਕਿੱਥੇ।
-----
ਸੱਚ ਦੀ ਖ਼ਾਤਰ ਸੂਲ਼ੀ ਅੱਜ ਕੱਲ ਕਿਹੜਾ ਚੜ੍ਹਦੈ,
ਸੱਚ ਲਈ ਪੀਵਣ ਵਾਲ਼ੇ ਜ਼ਹਿਰ-ਪਿਆਲੇ ਕਿੱਥੇ।
-----
ਅੱਧੀ ਦੁਨੀਆਂ ਰੀਂਗ ਰਹੀ ਹੈ, ਜਿਉਂਦੀ ਨਹੀਂ ਹੈ,
ਘਰ ਹੀ ਨਹੀਂ ਤਾਂ ਹੋਵਣਗੇ ਪਰਨਾਲ਼ੇ ਕਿੱਥੇ।
-----
ਚੋਰ ਲੁਟੇਰੇ ਘਰ ਦੇ ਬੂਹੇ ਬਾਰੀਆਂ ਲੈ ਗਏ,
ਇਸ ਘਰ ਨੂੰ ਹੁਣ ਲਾਈਏ ਸੱਜਣੋ ਤਾਲੇ ਕਿੱਥੇ।
-----
ਮੈਖ਼ਾਨੇ ਵਿਚ ਵੜਨ ਸਮੇਂ ਤਾਂ ਸਭ ਸਾਲਮ ਸੀ,
ਅੱਧੀ ਰਾਤੀਂ ਸਾਬਤ ਮਿਲਣ ਪਿਆਲੇ ਕਿੱਥੇ।
-----
ਲੋਕੀਂ ਆਖਣ “ਸਾਥੀ” ਸ਼ਾਇਰ ਕਿੱਡਾ ਵੱਡਾ,
ਪਰ ਮੈਂ ਆਖਾਂ ਮੈਂ ਹਾਂ ਸ਼ਾਇਰ ਹਾਲੇ ਕਿੱਥੇ।
No comments:
Post a Comment