ਸਾਹਿਤਕ ਨਾਮ: ਸੱਜਣ ਸਿੰਘ ‘ਸੱਜਣ’ ਅਜੋਕਾ ਨਿਵਾਸ: ਮੇਘੋਵਾਲ ਦੁਆਬਾ, ਜ਼ਿਲ੍ਹਾ : ਹੁਸ਼ਿਆਰਪੁਰ
ਪ੍ਰਕਾਸ਼ਿਤ ਕਿਤਾਬਾਂ: ਰਚਨਾਵਾਂ ਅਜੇ ਕਿਤਾਬੀ ਰੂਪ ਵਿਚ ਪ੍ਰਕਾਸ਼ਿਤ ਨਹੀਂ ਹੋਈਆਂ।
******
ਦੋਸਤੋ! ਹੁਸ਼ਿਆਰਪੁਰ ਵਸਦੇ ਗ਼ਜ਼ਲਗੋ ਇਕਵਿੰਦਰ ਜੀ ਨੇ ਸੱਜਣ ਸਿੰਘ ‘ਸੱਜਣ’ ਜੀ ਦੀ ਇਕ ਗ਼ਜ਼ਲ ਭੇਜ ਕੇ ਉਹਨਾਂ ਦੀ ਆਰਸੀ ਪਰਿਵਾਰ ਨਾਲ਼ ਪਹਿਲੀ ਸਾਹਿਤਕ ਸਾਂਝ ਪਵਾਈ ਹੈ। ਮੈਂ ਇਕਵਿੰਦਰ ਜੀ ਦੀ ਤਹਿ-ਦਿਲੋਂ ਸ਼ੁਕਰਗੁਜ਼ਾਰ ਹਾਂ। ਸੱਜਣ ਸਾਹਿਬ ਨੂੰ ਆਰਸੀ ਪਰਿਵਾਰ ਵੱਲੋਂ ਖ਼ੁਸ਼ਆਮਦੀਦ ਆਖਦਿਆਂ, ਇਸ ਗ਼ਜ਼ਲ ਨੂੰ ਅੱਜ ਦੀ ਪੋਸਟ ‘ਚ ਸ਼ਾਮਿਲ ਕਰਨ ਦਾ ਮਾਣ ਹਾਸਿਲ ਕਰ ਰਹੀ ਬਹੁਤ-ਬਹੁਤ ਸ਼ੁਕਰੀਆ।
ਅਦਬ ਸਹਿਤ
ਤਨਦੀਪ ਤਮੰਨਾ
*****
ਗ਼ਜ਼ਲ
ਜ਼ਿੰਦਗੀ ਦਾ ਅਸੂਲ ਹੁੰਦਾ ਹੈ।
ਬੇ-ਅਸੂਲਾ ਫ਼ਜ਼ੂਲ ਹੁੰਦਾ ਹੈ।
-----
ਮੁੱਲ ਮੁਹੱਬਤ ਦਾ ਕਈ ਵਾਰੀ,
ਥਲ ’ਚ ਸੜ ਕੇ ਵਸੂਲ ਹੁੰਦਾ ਹੈ।
-----
ਇਸ਼ਕ ਹੋਵੇ ਜੇ ਆਸ਼ਕਾਂ ਵਾਂਗਰ,
ਪਲ-ਛਿਣਾਂ ਵਿਚ ਕਬੂਲ ਹੁੰਦਾ ਹੈ।
-----
ਖੇਤ ਚਿੜੀਆਂ ਦੇ ਚੁਗਣ ਤੋਂ ਮਗਰੋਂ,
ਪੱਛੋਤਾਣਾ ਫ਼ਜ਼ੂਲ ਹੁੰਦਾ ਹੈ।
-----
ਕਰਨੀ ਇੱਜ਼ਤ ਖ਼ੁਦ ਤੋਂ ਵੱਡਿਆਂ ਦੀ ,
ਦਾਨਿਆਂ ਦਾ ਅਸੂਲ ਹੁੰਦਾ ਹੈ।
-----
ਤਾਂਘ ਹੋਵੇ ਜੇ ਇਕ ਹੀ ਪਾਸੇ,
ਇਸ਼ਕ ਐਸਾ ਫ਼ਜ਼ੂਲ ਹੁੰਦਾ ਹੈ।
-----
ਜਿੱਥੇ ਸਿੱਖਦੇ ਨੇ ਇਸ਼ਕ, ਆਸ਼ਕ
ਹਰ ਗਲ਼ੀ ਵਿਚ ਸਕੂਲ ਹੁੰਦਾ ਹੈ।
-----
ਜਿਸ ਦਾ ਕੋਈ ਅਸੂਲ ਨਾ ਹੋਵੇ,
ਉਹ ਤਾਂ ਬੰਦਾ ਫ਼ਜ਼ੂਲ ਹੁੰਦਾ ਹੈ।
-----
ਮੰਨੇ ਸੱਜਣ ਨੂੰ ਹੀ ਰੱਬ ‘ਸੱਜਣ’,
ਕਾਹਤੋਂ ਲੋਕਾਂ ਦੇ ਸੂਲ਼ ਹੁੰਦਾ ਹੈ ?
No comments:
Post a Comment