ਯਾਦਾਂ ਵਿਚ ਲਹਿਰਾਵੇ, ਚੁੰਨੀ ਚੰਨੀ ਦੀ।
ਰੋਜ਼ ਪੁਆੜੇ ਪਾਵੇ, ਚੁੰਨੀ ਚੰਨੀ ਦੀ।
-----
ਨੈਣਾਂ ਅੰਦਰ ਤਾਂ ਇਨਕਾਰ ਦਾ ਝਉਲ਼ਾ ਹੈ,
ਉਡ-ਉਡ ਕੋਲ਼ ਬੁਲਾਵੇ, ਚੁੰਨੀ ਚੰਨੀ ਦੀ।
-----
ਪੱਤਾ, ਗੁੱਡੀ, ਬੱਦਲ਼ ਬੇਸ਼ਕ ਉਡਦੇ ਨੇ,
ਦਿਲ ਦੇ ਤਾਈਂ ਉਡਾਵੇ, ਚੁੰਨੀ ਚੰਨੀ ਦੀ।
-----
ਇਹ ਲਹਿਰੇ ਤਾਂ ਪਾਣੀ ਲਹਿਰਾਂ ਵਿਚ ਬਦਲੇ,
ਵਾਅ ਨੂੰ ਵੀ ਮਸਤਾਵੇ, ਚੁੰਨੀ ਚੰਨੀ ਦੀ।
-----
ਕੰਧ ਉੱਤੇ ਪਰਛਾਵਾਂ, ਲਟਕੀ ਚੁੰਨੀ ਦਾ,
ਇਉਂ ਲਗਦੈ ਖ਼ੁਦ ਆਵੇ, ਚੁੰਨੀ ਚੰਨੀ ਦੀ।
-----
ਸਿਰ ‘ਤੇ ਓੜ੍ਹੀ ਹੋਵੇ, ਨਾਲ਼ ਸਲੀਕੇ ਦੇ,
ਆਦਰ ਦੂਣਾ ਪਾਵੇ, ਚੁੰਨੀ ਚੰਨੀ ਦੀ।
-----
ਦਸਤਾਰ ਜਿਦ੍ਹੇ ਇਮਾਨ ਦੀ ਸ਼ਾਹਦੀ ਹੈ ‘ਬਾਦਲ’,
ਉਹ ਕਾਹਤੋਂ ਸਹੁੰ ਖਾਵੇ? ਚੁੰਨੀ-ਚੰਨੀ ਦੀ।
No comments:
Post a Comment