ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Tuesday, August 17, 2010

ਅਮਰਜੀਤ ਸਿੰਘ ਸੰਧੂ - ਗੀਤ

ਸ਼ਿਵ ਬਟਾਲਵੀ ਨੂੰ

ਗੀਤ

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ ਮਹਿਰਮਾ ਵੇ

ਫੁੱਲੀਆਂ ਕਨੇਰਾਂ ਘਰ ਆ।

ਅਸੀਂ ਪਛਤਾਏ ਤੈਨੂੰ ਕਰਕੇ ਨਰਾਜ਼ ਬੀਬਾ

ਹਾੜਾ ਸਾਡੀ ਬਖ਼ਸ਼ ਖ਼ਤਾ....

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ....

-----

ਗ਼ਮ ਤੇਰਾ ਸਾਡੇ ਤੋਂ ਵਰਾਇਆ ਨਹੀਓਂ ਜਾਂਦਾ ਚੰਨਾ

ਆਪ ਆ ਕੇ ਏਸ ਨੂੰ ਵਰਾ।

ਪੀੜ ਤੇਰੀ ਝੱਲੀ, ਝੱਲੀ ਜਾਂਦੀ ਨਹੀਓਂ ਸਾਡੇ ਕੋਲ਼ੋਂ

ਆ ਕੇ ਫੰਬਾ ਚੁੰਮਣਾਂ ਦਾ ਲਾ...

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ....

-----

ਪੀੜਾਂ ਦਾ ਪਰਾਗਾ ਤੇਰਾ, ਰੁੜ੍ਹ ਚੁੱਕੈ ਸੋਹਣਿਆ ਵੇ

ਆਹ ਲੈ ਝੋਲ਼ੀ ਆਪਣੀ ਪੁਆ।

ਆਟੇ ਦੀਆਂ ਚਿੜੀਆਂ ਨੇ ਪਾਉਂਦੀਆਂ ਦੁਹਾਈ ਬੀਬਾ

ਸਾਨੂੰ ਚਿੜੀ-ਮਾਰਾਂ ਤੋਂ ਬਚਾ....

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ....

-----

ਛੱਜ ਵਿਚ ਪਾ ਕੇ ਛੱਟੀ ਲਾਜਵੰਤੀ ਨਿੰਦਕਾਂ ਨੇ

ਲਾਹ ਕੇ ਲੱਜ, ਵੇਚ ਕੇ ਹਯਾ।

ਡੁੱਸ-ਡੁੱਸ ਰੋਵੇ ਤੇਰੀ ਲੂਣਾ ਫੇਰ ਪੂਰਨਾ ਵੇ

ਅੰਗ ਇਹਦੇ ਅੰਗਾਂ ਨੂੰ ਛੁਹਾ....

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ....

-----

ਗ਼ਮ ਤੇਰਾ ਭੰਡਿਆ ਸੀ ਜਿਹਨਾਂ ਤੇਰੇ ਦੋਖੀਆਂ ਨੇ

ਕਹਿਕੇ ਢੌਂਗ ਰਚ ਹੈ ਰਿਹਾ।

ਉਹਨਾਂ ਨੇ ਵੀ ਪਿੱਟ-ਪਿੱਟ ਲਾਲ ਕੀਤੀ ਹਿੱਕ ਚੰਨਾ

ਗ਼ਮ ਤੇਰਾ ਜਾਵੇ ਨਾ ਸਿਹਾ....

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ....

-----

ਉਹਨਾਂ ਸ਼ਰਧਾਂਜਲੀਆਂ ਮਰਸੀਏ ਲਿਖ ਲਿਖ

ਚਿੱਠਿਆਂ ਚ ਦਿੱਤੇ ਨੇ ਛਪਾ।

ਨਾਮ ਤੇਰਾ ਲੈ ਕੇ, ਉੱਚੀ ਧਾਹ ਮਾਰ ਸੋਚਦੇ ਨੇ

ਕੱਦ ਸਾਡਾ ਉੱਚਾ ਹੋ ਗਿਆ....

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ....

-----

ਵੇਖ ਕੇ ਬੁਲੰਦੀ ਤੇਰੀ, ਲੱਥਦੀ ਸੀ ਪੱਗ, ਕਈਆਂ

ਵੇਖੋ-ਵੇਖੀ ਲੱਗ ਲਈ ਲੁਹਾ।

ਮੈਂ ਅਤੇ ਮੈਂ ਉੱਤੇ ਮੈਂ-ਮੈਂ ਤੂੰ-ਤੂੰ ਕੀਤੀ ਉਹਨਾਂ

ਜਿਨ੍ਹਾਂ ਲੱਗੀ ਕਾਲਜੇ ਨੂੰ ਭਾਅ...

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ....

-----

ਨਾਨਕ ਫ਼ਕੀਰ ਵੀ ਆਖਿਆ ਕੁਰਾਹੀਆ ਜਿਹਨਾਂ

ਬੀਬਾ! ਕਾਹਦਾ ਉਹਨਾਂ ਤੇ ਗਿਲਾ?

ਕਲਾ ਦੇ ਪੁਜਾਰੀਆਂ ਨੇ ਜੰਮਦੀ ਕ਼ਲਮ ਤੇਰੀ

ਚੁੰਮ ਲਈ ਸੀ ਅੱਖਾਂ ਨੂੰ ਛੁਹਾ...

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ....

-----

ਸਾਂਭ ਆ ਕੇ ਹੰਝੂਆਂ ਚ ਡੁੱਬੀ ਹੋਈ ਲੇਖਣੀ ਨੂੰ

ਲੈਂਦੀ ਭੈੜੀ ਉੱਚੇ ਉੱਚੇ ਸਾਹ।

ਰੁੱਖੇ-ਰੁੱਖੇ ਅੱਖਰਾਂ ਚ ਕਾਨੀਆਂ ਦੀ ਜੀਭ ਸੁੱਕੀ

ਇਕ ਛਿੱਟ ਚਾਨਣੀ ਪਿਲ਼ਾ...

ਵਾਸਤਾ ਈ ਸਾਡਾ, ਸਾਡੇ ਦਿਲਾਂ ਦਿਆ....


1 comment:

harpal said...

wah! kia baat hai.