ਅਮਿਤ ਬਾਵਾ - ਨਜ਼ਮ

ਦੋਸਤੋ! ਸਤਿਕਾਰਤ ਡਾ: ਪ੍ਰੇਮ ਮਾਨ ਜੀ ਨੇ ਸਤਿਕਾਰਤ ਅਮਿਤ ਬਾਵਾ ਜੀ ਦੀ ਇੱਕ ਬੇਹੱਦ ਖ਼ੂਬਸੂਰਤ ਨਜ਼ਮ ਭੇਜ ਕੇ, ਬਾਵਾ ਸਾਹਿਬ ਦੀ ‘ਆਰਸੀ’ ਦੇ ਸਾਹਿਤ ਪ੍ਰੇਮੀਆਂ ਨਾਲ਼ ਪਹਿਲੀ ਸਾਂਝ ਪਵਾਈ ਹੈ।ਡਾ: ਸਾਹਿਬ ਦੇ ਦੱਸਣ ਮੁਤਾਬਕ, ਅਮਿਤ ਜੀ ਅਤੇ ਉਨ੍ਹਾਂ ਦੀ ਪਤਨੀ ਜਯੋਤੀ ਜੀ ਅੰਮ੍ਰਿਤਸਰ ਰਹਿੰਦੇ ਹਨ ਅਤੇ ਬਹੁਤ ਸਾਰੇ ਚੰਗੇ ਕੰਮ ਕਰ ਰਹੇ ਹਨ। ਜਯੋਤੀ ਜੀ ਲਿਖਣ ਦੇ ਨਾਲ਼-ਨਾਲ਼ ਨਾਟਕ ਵੀ ਡਾਇਰੈਕਟ ਕਰਦੇ ਹਨ। ਦੋਵੇਂ ਹੀ ਗਰੀਬ ਬੱਚੀਆਂ ਦੀ ਮੱਦਦ ਕਰਨ ਲਈ ਸੰਵਾਦ ਸਭਾ ਚਲਾਉਂਦੇ ਹਨ। ਮੈਂ ਡਾ: ਸਾਹਿਬ ਦਾ ਬੇਹੱਦ ਸ਼ੁਕਰੀਆ ਅਦਾ ਕਰਦੀ ਹਾਂ ਅਤੇ ਅਮਿਤ ਬਾਵਾ ਜੀ ਨੂੰ ਆਰਸੀ ਦੇ ਸਾਰੇ ਪਾਠਕ /ਲੇਖਕ ਵਰਗ ਵੱਲੋਂ ਖ਼ੁਸ਼ਆਮਦੀਦ ਆਖਦੀ ਹਾਂ।

ਪਾਣੀ

ਨਜ਼ਮ

ਨਾ ਹਿੰਦੂ ਨੂੰ ਜਾਣਦੀ

ਨਾ ਸਿੱਖ ਨੂੰ …

ਨਾ ਧਰਮ ਨੂੰ ਜਾਣਦੀ

ਨਾ ਅਧਰਮ ਨੂੰ…!

ਨਾ ਈਮਾਨ ਨੂੰ ਜਾਣਦੀ

ਨਾ ਬੇਈਮਾਨ ਨੂੰ ..!

ਉਹਦੇ ਲਈ ਨਾ ਕੋਈ ਦੋਸਤ

ਨਾ ਦੁਸ਼ਮਣ …!

ਉਹ ਜਦ ਜਾਗਦੀ

ਤਾਂ ਬੱਸ ਉਹੀ ਜਾਗਦੀ

ਨਾ ਆਸ

ਨਾ ਬੇਆਸ

ਹਾਂ

ਉਹ……‘ਪਿਆਸ’

ਬੱਸ……‘ਪਿਆਸ’

----

ਪਿਆਸ ਦਾ ਧਰਮ----ਪਾਣੀ

ਪਿਆਸ ਦੀ ਤਲਾਸ਼ ਦਾ

ਕਰਮ ------ਪਾਣੀ

ਪਿਆਸ ਦੇ ਸੱਚੇ ਅਹਿਸਾਸ ਜਿੱਡਾ ਸੁੱਚਾ

ਕਿੱਥੇ ਹੋਣਾ ਸੀ ਕੋਈ

ਜੇ ਨਾ ਹੁੰਦਾ -------

ਭਾਈ ਘਨ੍ਹਈਆ

---

ਗੋਬਿੰਦ ਨੇ ਛੋਹਿਆ

ਪਿਆਸ ਤ੍ਰਿਪਤ ਹੋਈ ਉਹਦੀ

ਪਿਆਸਿਆਂ ਲਈ ਫੇਰ

ਉਹ ਪਾਣੀ ਬਣਿਆ

ਦੋਸਤੀ …ਦੁਸ਼ਮਣੀ ……

ਧਰਮ ……ਅਧਰਮ ……

ਸੱਚ……ਝੂਠ

ਤੋਂ ਪਾਰ ਹੋ….!

----

ਉਹ ਬੱਸ ਪਾਣੀ ਬਣਿਆ

ਪਿਆਸ ਦਾ ਹਾਣੀ ਬਣਿਆ

ਹਰ ਜ਼ਖਮ ਲਈ ਮਰਹਮ ਬਣਿਆ …!

ਮਸ਼ਕ ਫੜੀ ਉਸ…ਰੱਬ ਦੀ

ਵੇਖੋ !

ਉਹ ਮਾਸ਼ਕੀ

ਗੁਰੁ ਦਾ ਸੱਚਾ ਸਿੱਖ

ਪਾਣੀ ਬਣਿਆ-- ਪਾਣੀ ਹੋਇਆ………।